أحلي أيام . بقلم الشاعر / الأحمدي شحاتة .
صفحة 1 من اصل 1 • شاطر
أحلي أيام .
بقلم الشاعر / الأحمدي شحاتة .
أحلي ايام عشناها أنا وحبايبي زمان
كنا بنحلم حلمنا
ونحققوا مع بعضنا بأمان
كانت احلامنا أحلام بسيطة
نحلمها بأي مكان
نايمين بنحلم صاحيين بنحلم
قاعدين بنحلم ماشين بنحلم
حلمنا مكنش له عنوان
أحلي أيام عشناها أنا وحبايبي زمان
كنت بحلم بالبسكلتة
أركبها وأسيب ايديا
وألف بيها وأنا فرحان
كنت بحلم برحلة حلوة تلمنا
أنا واصحابي وحبايبي والجيران
والرحلة ..... ما كانتش بعيد
دي كانت بألكة بسيطة وعيش
وقاعدة حلوة ع الكرنيش
نلعب ونجري والسهرة تحلي
والضحكة تعلي
تفرح القلب الزعلان
أحلي أيام عشناها أنا وحبايبي زمان
وأيام ما كنا بنروح لجدي ويلمنا
أنا وأخواتي وولاد أعمامي وولاد خلاتي
وكمان ولاد الجيران
كان يحكيلنا حكايات حلوة قديمة
كلها فهم وعلام
وتخلص الحكاية ونقولة قول كمان
مكنش يزهق ويقول ومالة
كااااااان يااااااااما كان
وستي كانت واقفة طول اليوم
تحضرلنا أكلنا اصناف وألوان
وكانت لما تجهز أكلنا ويكون كلة تمام
تنادي علينا بعلو صوتها وتقولنا
يا ولاد مين جعان
كنا كلنا بصوت واحد نقول أنا
ونضحك ضحكة واحدة من قلبنا
وقاعدة حلوة تلمنا
ومن ايديها تأكلنا في بوقنا
وقلبها مليان حب وحنان
أحلي أيام عشناها أنا وحبايبي زمان
كان أبويا زمان بيعمل معانا حجات غريبة
مكنتش اعرف لية
كان ديما بيخاف علينا ويحطنا بعنية
ولما كبرت وربي رزقني بالضني
عرفت أبويا كان بيعمل معانا كدة لية
حسيت بحملة وأنشغالة
وهمنا اللي كان شاغل بالة بية
كان لما يخرج وياخدني في ايدية
الناس كلها تجري تسلم علية
كان الصغير والكبير
يعملة ألف حساب وأحترام
كنت أحب دايما أكون معاه
لأنة كان عالي المقام
علمني حجات كتير
علمني ابقي راجل علمني ابقي عاقل
علمني الادب والاخلاق والاحترام
ألف رحمة ونور عليك يابا
ياللي كنت ناصر الغلبان
أحلي أيام عشناها أنا وحبايبي زمان
وست الحبايب الغالية
اللي دعوتها للسما عالية
كانت أمي زمان
قلبها مليان حب وحنان
وحضنها دافي كنت دايما أحس فية بالامان
كانت تسهر ليالي
وبأيديها تطبطب بحنية
عشان بس أغمض عنيا وأنام
وكانت تصحي والصبح لسة بيشقشق
قبل ما حد فينا يحصي من المنام
وتقوم تجهز وتحضر
وبعد ما كل حاجة تبقي تمام
تصّحي كل واحد فينا
بلمسة حب وحنان
كان قلبها وبيتها مفتوحين
للغريب قبل القريب كمان
كانت في الليل والنهار
يسألوا عليها الجيران
كنت بسمع منها دايما
النبي (صً) وصانا ياأبني علي الجيران
كانت الطيبة اللي في قلبها
تتوزع علي العالم ويفيض كمان
ما كنتش تعرف تنام
لو حد فينا ما رجعش من برة
أو حتي جعان
كانت لما تشوفني رافع عنيا للسما
تلمسني بأديها الحنيينة
وتقولي سيبها لله علي اية سرحان
كنت اقوم من نومي وأنا مفلس وزهقان
ألقي فلوس في بنطلوني
وأقولها منين تقولي من عند ربك
واللي معاة ربة ديما في امان
وأللا الهزار والمناغشة والحكاوي والتسالي
والضحكة الحلوة مع الاهالي
تحسها مخلوقة من جنس تاني
كأنها ملاك من الملايكة
مش من زماني
أسرار ناس كتير كانت عندها
وموصوفة بالكتمان
مفيش حد في يوم كان بيتكلم عنها
إلا بالحب والإحسان
لو هقول عنها مش هسكت
وهقول من الكلام بركان
كلام بحب وشوق ولهفة
عنك أنتي ياأمي يا أحن إنسان
ألف رحمة ونور عليكي يا أمي
ياللي قلبك كان نبع من الحنان
عشناها أنا وحبايبي زمان
الأحمدي شحاتة
مواضيع مماثلة
للمشاركة انت بحاجه الى تسجيل الدخول او التسجيل
يجب ان تعرف نفسك بتسجيل الدخول او بالاشتراك معنا للمشاركة
صفحة 1 من اصل 1
صلاحيات هذا المنتدى:
لاتستطيع الرد على المواضيع في هذا المنتدى